षडयन्त्र रोक्न चुरे भावरले आन्दोलन गर्ने

आफ्नोन्यूज, चैत १२ गते मंगलबार

भद्रपुर । चुरे भावर राष्ट्रिय एकता पार्टी नेपालका केन्द्रीय अध्यक्ष केशवप्रसाद मैनालीले नेपालको राष्ट्रिय एकता र अखण्डताको संरक्षण, गैर नेपालीले लिएको नागरिकता खारेज गर्न र तर्राई विखण्डन गर्नेजस्ता षडयन्त्र रोक्न आफ्नो दलले सडकदेखि सदनसम्म आन्दोलन गर्ने उद्देश्यले संविधानसभाको निर्वाचनमा भाग लिएको बताउनुभएको छ ।

उक्त दलद्वारा झापाको विर्तामोडमा सोमबार आयोजित पत्रकार भेटघाट कार्यक्रममा उहाँले आफ्नो दलले तर्राईका आदिवासी, जनजाति, दलित, उत्पीडित, पिछडिएका वर्ग र अन्य जातिको अस्तित्व रक्षाका लागि कार्य गर्ने बताउँदै सीमा सुरक्षाका लागि नेपाल-भारतबीच खुल्ला आवत-जावत रोक्नुपर्ने धारणा व्यक्त गर्नुभयो ।कार्यक्रममा सो पार्टीको केन्द्रीय सचिव बद्री न्यौपानेले आफ्नो दलले संविधानसभा निर्वाचनका लागि प्रत्यक्षतर्फ १३ जिल्लामा तीन महिलासहित २२ जना र समानुपातिकतर्फ२२ महिलासहित ४३ जना उम्मेदवार उठाएको जानकारी दिनुभयो