टेन्डरको कागजपत्रहरु चोरेको आरोपमा तीन पक्राउ

आफ्नोन्यूज, चैत १९ गते मंगलबार

तुलसीपुर । मध्यपश्चिम सडक डिभिजन कार्यालय दाङमा टेन्डरको कागज पत्रहरु चोरेको आरोपमा तीनलाई पक्राउ गरिएको छ । जिल्ला प्रहरी कार्यालय दाङका अनुसार पक्राउ पर्नेहरुमा त्रिनपा १० नयाँ बजार घोराहीका करिब २२ वर्षिय अर्जुन परियार, त्रिनपा- ८ डुमर गाउँका ३० वर्षिय नरेश दर्लामी र १९ वर्षिय अनिल गिरी रहेका छन । तुलसीपुरस्थित पातुखोलाको टेन्डरमा हिजो पाँच जनाले बोलपत्र दर्ता गराएकोमा चुमुल्का बनाई बोलपत्र खोल्ने बेलामा नकावधारी युवाहरुले कागजपत्र लुटेर लगेको सडक डिभिजन कार्यालय, दाङले जनाएको छ । सो घटना भएलगत्तै सशस्त्र प्रहरी र जनपथ प्रहरीको गस्ती टोलीले उनीहरुलाई घोराही बजारदेखि करिब चार किलोमिटर उत्तर जङ्गलबाट पक्रेर ल्याएको जनाएको छ । घटनामा संलग्न अन्य व्यक्तिको खोजी भइरहेको जिल्ला प्रहरी कार्यालयले जनाएको छ ।