सुरक्षा सुदृढ गर्न प्रधानमन्त्रीको निर्देशन

आफ्नोन्यूज, चैत २७ गते बुधबार

काठमाडौ । संविधान सभाको चुनावको पूर्वसन्ध्यामा देशका विभिन्न स्थानमा झडप र हत्याका घटना हुनथालेपछि सुरक्षाअवस्था प्रति सरकार गम्भीर भएको छ । २७ चैतको विहानै प्रधानमन्त्री गिरिजाप्रसाद कोइरालाले सुरक्षा निकायका चारै जना प्रमुख र सुरक्षाअधिकारीहरु बोलाई छलफल गरेका छन् ।
प्रधानमन्त्री निवास बालुवाटारमा भएको छलफलमा सुर्खेतमा एमाले उम्मेदवार र दाङमा वाइसिएल कार्यकर्ताको हत्या भएपछि उत्पन्न परिस्थितिबारे जानकारी लिएका थिए । उनले तत्काल सुरक्षा सुदृढ गरी चुनावलाई हिंसारहित बनाउन निर्देशन दिएको स्रोतले बतायो । स्रोतका अनुसार प्रधानमन्त्रीले सेनालाई उच्च शर्तकमा रहन भनेका छन् । उनले आवश्यक परे सेना परिचालन सम्म गर्न सकिने संकेत दिएको बुझिएको छ ।
छलफलमा प्रधानमन्त्री कोइरालासहित प्रधानसेनापति रुक्माङ्गत कटवाल, नेपाल प्रहरीका महानीरिक्षक ओमविक्रम राणा, सशस्त्र प्रहरी महानीरिक्षक वासुदेव ओली, राष्ट्रिय अनुसन्धानका प्रमुख धनसिंह कार्की, गृहसचिव उमेशप्रसाद मैनाली सहभागी थिए ।