दाङमा मर्ने माओवादीको संख्या ७ पुग्यो

आफ्नोन्यूज, चैत २७ गते बुधबार

नेपालगञ्ज । जिल्ला प्रशासन कार्यालय दाङले हिजो राति साढे १० बजेदेखि लगाएको कफर्यू अहिले बिहान ७ बजे हटाएको छ ।
दाङको चैलाही र सतबरिया गाविसमा अनिश्चितकालीन लगाएको कर्फ्यु बिहान प्रशासनले हटाएको सूचना जारी गरेको हो ।
यसैबीच, दाङमा गोली लागी घाइते भएकामध्ये थप २ माओवादी कार्यकर्ताको मृत्यु भएको छ । यो सँगै मर्नेको संख्या सात पुगेको छ ।
नेपालगञ्जमा उपचार भइरहेका एक र बुटवलमा उपचार भइरहेका एक माओवादी कार्यकर्ताको आज बिहान मृत्यु भएको माओवादीले जनाएको छ ।
मृत्यु हुनेमा बुटवल चेतबहादुर बुढा र कोहलपुरमा प्रकाश जीएम रहेको माओवादी जिल्ला सदस्य विश्वराज आचार्यले बताउनुभयो ।
हिजो राति देउखुरीको लमहीमा सशस्त्र प्रहरीको गोलीले पाँच माओवादी कार्यकर्ताको मृत्यु भएको थियो ।
मृत्यु हुनेमा दाङ राजपुर गाविसका मीनबहादुर पुन, सौडियार गाविस जबरपुरका शीतल चौधरी, जीवलाल चौधरी, सैलाहीका लबरु चौधरी र राजपुरका पुनजङ्ग सिंह रहेका छन् । घटनामा २० माओवादी घाइते भएका छन् ।
घाइतेहरूलाई प्राथमिक स्वास्थ्य केन्द्र लमहीमा सामान्य उपचार गरी नेपालगञ्ज र भैरहवा पुर्‍याइएको छ ।
हिजो राति पौने ७ बजे देउखुरी सतबरियाबाट लमहीतर्फजाँदै गरेको माओवादी कार्यकर्ता चढेको गाडीमा पूर्वबाट गाडीमा आइरहेको सशस्त्र प्रहरीले गोली चलाएको थियो ।
घटना हुनुभन्दा केही समयअघि देउखुरीको सतबरिया गाविसमा नेपाली काङ्ग्रेस र माओवादीका कार्यकर्ताबीच झडप भएको थियो ।
झडप भएलगत्तै नेपाली काङ्ग्रेस क्षेत्र नं. १ का उम्मेदवार खुमबहादुर खड्का इलाका प्रहरी कार्यालय लमहीमा पुगी सदरमुकाम घोराही आउनुभएको थियो ।
त्यसपछि झडप भएको ठाउँतिर जाँदै गरेको सशस्त्र प्रहरी टोलीले सतबरियाबाट गाडीमा र्फकँदै गरेका माओवादी कार्यकर्तामाथि गोली चलाएको हाम्रा सहकर्मिले जनाएका छन् ।
माओवादीले आज दिउँसो १ बजे लमहीबाट विरोध प्रदर्शन सहित शवयात्रा गर्ने भएको छ ।